Ukrainanyň parlamenti ykdysadyýet ministri we ABŞ bilen möhüm mineral serişdeler boýunça gepleşiklere ýolbaşçylyk eden wise-premýer Ýuliýa Swiridenkony täze premýer-ministr hökmünde tassyk etdi. Ministrler kabinetindäki üýtgeşiklik Kiýewiň Waşington bilen gatnaşyklaryny güýçlendirmäge we uruş döwründäki ýurduň ösüşine täze depgin bermäge gönükdirilendir.
17-nji iýulda geçirilen ses berişlikde 450 orunlyk parlamentiň 262 deputaty Swiridenkony goldady, 22 deputat garşy ses berdi, 26 deputat bolsa ses bermekden saklandy.
39 ýaşly ykdysadyýetçi Swiridenko Waşington bilen möhüm mineral serişdeler baradaky ylalaşygy gazanmakda esasy rol oýnandygy sebäpli ABŞ-da gowy tanalýar. Ol Ukrainanyň taryhynda iň uzak wagt hökümete ýolbaşçylyk eden premýer-ministr Denys Şmygalyň ornuny tutdy.
Prezident Wolodymyr Zelenskiniň karary bilen, Şmygal indi Goranmak ministrliginiň başlygyna geçer we ýurduň içerki ýarag önümçiligini güýçlendirmäge gönükdirilen tagallalara ýolbaşçylyk eder. Zelenski bu çäräni Russiýanyň giň gerimli çozuşyndan soň dördünji ýylyna giren uruş döwründe ýurduň goranyş pudagyny güýçlendirmek maksady bilen amala aşyrýar.
Şu hepde wezipä hödürlenende Swiridenko özüniň esasy maksadynyň “Ukrainanyň goranmak we howpsuzlyk güýçlerini üpjün etmek hem-de döwletiň durnuklylygyny kepillendirmekdigini” aýtdy.
Zelenskiniň kararlary ýurduň uruş tagallalaryny güýçlendirmäge gönükdirilse-de, täze üýtgeşikligiň ABŞ bilen, esasan-da, Ak tam bilen aragatnaşygy we hyzmatdaşlygy güýçlendirmek maksady bilen edilýändigi bellenilýär.
2021-nji ýylda ykdysady ösüş we söwda ministri, şeýle-de wise-premýer wezipesine bellenen Swiridenko ABŞ bilen möhüm mineral serişdeler we seýrek ýer elementleri boýunça gepleşiklere ýolbaşçylyk etdi.
Tramp bu ylalaşygy Ukraina boýunça syýasatynyň esasy bölegine öwürdi we 2022-nji ýylyň fewral aýynda Russiýa tarapyndan başlanan giň gerimli uruşdan bäri ABŞ-nyň Ukraina iberen kömegi jemi 175 milliard dollara golaý bolansoň, munuň üçin ABŞ-nyň çykdajylarynyň öweziniň dolunmalydygyny aýtdy.
Swiridenko aprel aýynda Waşingtona baryp, Birleşen Ştatlaryň maliýe sekretary Skott Bessent bilen ABŞ-Ukraina Dikeldiş Maýa goýum fonduny döretmek baradaky ylalaşyga gol çekdi. Bu ylalaşyga laýyklykda, ABŞ ukrain topraklarynda amala aşyryljak täze mineral we energiýa taslamalaryndan gazanylýan girdejilere paýdaş bolmak hukugyna eýe boldy.
Tramp bu ylalaşygyň ABŞ-nyň Ukraina berýän goranyş we dikeldiş kömekleri babatynda öz bähbitlerini üpjün edýändigini aýtdy.
Forum